काठमाडौं । चर्चित रियालिटी शो ‘नेपाल आइडल’को चौथो सिजनको प्रसारण मिति सार्वजनिक गरिएको छ । ‘नेपाल आइडल सिजन ४’ मंसिर २३ गतेबाट प्रसारण हुनेछ ।
यो शोका होस्ट आसिफ शाहले प्रसारण मिति सार्वजनिक गरेका हुन् । ‘नेपाल आइडल’ एपी १ एचडी टेलिभिजनबाट प्रसारण हुनेछ । उनले राजा महाराजाहरुको पालामा अग्लो ठाउँबाट कटुवालले सन्देश पुर्याउने शैलीमा यो रियालिटी शोको चौथो सिजनको प्रसारण मिति सार्वजनिक गरेका छन् ।
नेपाल आइडलका अघिल्ला तीन सिजनले दर्शकको उल्लेख्य साथ पाएको थियो । यो शोबाट जन्मिएका थुप्रै प्रतिभाहरु अहिले नेपाली सांगीतिक क्षेत्रमा चर्चित छन् ।
चौथो सिजनमा संगीतकार शम्भुजित बास्कोटा, गायक सुगम पोखरेल र गायिका सुबानी मोक्तान निर्णायकको रुपमा छन् भने शोका निर्देशक सुरेश पौडेल हुन् ।
यसपटक निर्णायकहरुको छनोटमा एक सय भन्दा बढी प्रतिस्पर्धी अगाडि बढ्नेछन् । तर, गाला राउण्डमा पुग्दा १२ जना प्रतिस्पर्धीले उपाधिका लागि प्रतिस्पर्धा गर्नेछन् ।
