दाङ–
आजबाट १२ वर्षभन्दा माथिका दीर्घरोगी बालबालिकालाई कोरोनाविरुद्धको खोप लगाइदैछ । अमेरिकाले उपलब्ध गराएको १ लाख ६ सय २० मात्रा फाइजर खोप १८ वर्षमुनिका र १२ वर्षभन्दा माथिका दीर्घरोगी बालबालिकालाई लगाउन थालिएको हो ।
कोभ्याक्स सुविधामार्फत् सहयोग स्वरुप फाइजर बायोएनटेकले विकास गरेको फाइजर खोप आजबाट लगाइने स्वास्थ्य तथा जनसङ्ख्या मन्त्रालयका सह प्रवक्ता डा.समिर कुमार अधिकारीले बताउनुभयो ।
उहाँले खोप केन्द्रमा जाँदा चिकित्सकले प्रिस्काइब गरेका पुर्जा वा चिकित्सकले उपचार गरिरहेको कागज लिएर जान पनि आग्रह गर्नुभयो । सरकारले फाइजरको खोपलाई ९५ प्रतिशत प्रभावकारी रहेको बताएको छ ।
अन्य खोपको तुलनामा फाइजर खोप लगाउने तरिका फरक भएका कारणले सरकारले तालिम पश्चात मात्रै आजबाट खोप लगाउने भएको हो ।
खोप लगाउनेमा मुटुरोगी, दमका रोगी, क्यान्सर, मिर्गौला, मधुमेह, रोग प्रतिरोधात्मक क्षमता कमजोर रहेका लगायतका बालबालिका रहेका छन् । सरकारले खोप लगाउनका लागि देशभर २४ खोप केन्द्रहरू तोकेको छ । दाङमा राप्ती स्वास्थ्य विज्ञान प्रतिष्ठान गएर खोप लगाउन पाइनेछ ।
यस्तै मेची अस्पताल, कोशी अस्पताल, वी पि. कोइराला स्वास्थ्य विज्ञान प्रतिष्ठान, गजेन्द्र नारायण सिंह स्वास्थ्य विज्ञान प्रतिष्ठान, प्रादेशिक अस्पताल जनकपुर, नारायणी अस्पताल, वी. पि. कोइराला क्यान्सर अस्पताल भरतपुर, गण्डकी स्वास्थ्य विज्ञान प्रतिष्ठान, धवलागिरी अस्पताल, लुम्बिनी प्रादेशिक अस्पताल, भेरी अस्पताल, कणर्ाली प्रादेशिक अस्पताल, डडेलधुरा अस्पताल, सेती अस्पतालमा खोप लगाउन सकिने छ ।
यसैगरी काठमाडौं उपत्यकामा वीर अस्पताल, त्रिवि शिक्षण अस्पताल, महाराजगञ्ज, निजामती सेवा अस्पताल, शहिद गङ्गालाल हृदयरोग केन्द्र, भक्तपुर क्यान्सर अस्पताल, शहिद धर्मभक्त राष्ट्रिय प्रत्यारोपण केन्द्र, पाटन अस्पताल, वीरेन्द्र सैनिक अस्पताल र धुलिखेल अस्पतालमा गएर खोप लगाउन पाइनेछ ।
