काठमाडौं । अफगानिस्तानमा पूर्व वरिष्ठ सरकारी अधिकारीबाट एक करोड २४ लाख डलरको नगद र सुन तालिबानले जफत गरेको छ ।
बुधबार एक विज्ञप्ति जारी गर्दै तालिबानको नियन्त्रणमा रहेको केन्द्रीय बैंकले पूर्व सरकारका उपराष्ट्रपति अमरुल्लाह सलेह लगायतका वरिष्ट सरकारी अधिकारीबाट उक्त नगद तथा सुन जफत गरिएको हो ।
विज्ञप्तिमा उल्लेख गरिएअनुसार यी सबै पैसा तथा सुन उनीहरुको घरमा राखिएको थियो । तर, के प्रयोजनका लागि उक्त पैसा राखिएको हो भन्ने खुल्न सकेको छैन ।
पूर्व सरकारका उपराष्ट्रपति सलेह अहिले कहाँ छन् भन्ने थाहा छैन । उनले तालिबानविरुद्ध लड्ने बताउँदै आएका छन् । गत साता उनको परिवारका एक सदस्यले बताएअनुसार तालिबानले उनको भाइ रोहुल्लाह अजिजिको हत्या गरेको थियो ।
अर्को एक विज्ञप्तिमार्फत केन्द्रीय बैंकले अफगान नागरिकलाई आफ्नो मुलुकको राष्ट्रिय मुद्रा प्रयोग गर्न आग्रह गरेको छ । अफगानिस्तानको बैंक र कम्पनीमा अहिले पैसा अभाव देखिएको र विशेषगरी सबैभन्दा धेरै प्रयोग हुने अमेरिकी डलरको कमी भएको समाचार आएको थियो ।
गत साता केन्द्रीय बैंकले स्थानीय बैंकहरुलाई राजनीतिकरुपमा मुछिएका मानिसहरुको खाता फ्रिज गर्न निर्देशन दिएको दुई कमर्सियल बैंकरहरुले बताएका छन् ।
– एजेन्सी
