काठमाडौं । नेपाली कांग्रेसमा विशेष महाधिवेशन बेलादेखिको विवाद चुनावको समयमा सामसुम देखिए पनि अहिले फेरि चर्किएको छ । निवर्तमान सभापति शेरबहादुर देउवा पक्षका कार्यवाहक सभापति पूर्णबहादुर खड्का र नेता डा शेखर कोइराला समूहले समानान्तर गतिविधि गरेपछि कांग्रेसको विवाद सतहमा फेरि आएको हो ।
कांग्रेस नेता तथा पूर्वगृहमन्त्री रमेश लेखक पक्राउ परेपछि पूर्णवबहादुर खड्काले ‘कार्यवाहक सभापति’ को हैसियतामा विज्ञप्ति जारी गरेका थिए । जबकि नेपाली कांग्रेसका प्रवक्ता देवराज चालिसेले छुट्टै विज्ञप्ति जारी गरेका थिए ।
यससँगै खड्का–कोइराला समूहले प्रतिनिधिसभामा निर्वाचित सांसदहहरूका लागि छुट्टै बधाई कार्यक्रमको आयोजना गरेको छ । धुम्बाराहीस्थित स्मार्ट मलमा आयोजित कार्यक्रम दिउँसो एक बजेलाई तय भएको छ । ‘आजको कार्यक्रमलाई मिडियामा अलग्गै बैठक भनिएको छ, तर बैठक भन्दा पनि बधाई कार्यक्रम राखिएको हो,’ डा शेखर कोइरालाका स्वकीय सचिव दिनेश थपलियाले भने ।
उक्त कार्यक्रममा समसामयिक वा आन्तरिक राजनीति र सर्वोच्च अदालतमा दायर गरेको रिटबारे छलफलसमेत हुने जनाइएको छ । सर्वोच्चमा दायर रिटको पेसी चैत २२ गतेका लागि तोकिएको छ ।
गत पुसमा भएको विशेष महाधिवेशनले चयन गरेको नयाँ नेतृत्वलाई निर्वाचन आयोगले आधिकारिकता दिएपछि त्यसविरुद्ध सर्वोच्च अदालतमा रिट दायर गरेको देउवा समूहले अलग्गै गतिविधि गर्दै आइरहेको छ ।
पूर्वगृहमन्त्री रमेश लेखक पक्राउ परेपछि कार्यवाहक सभापतिको हैसियतमा वक्तव्य जारी गरेका खड्का र कोइरालाकै अगुवाइमा बधाई कार्यक्रम आयोजना गरिएको हो ।
उक्त समूहले प्रतिनिधिसभामा निर्वाचित पार्टीका सांसदहरूलाई सोमबार बधाइको कार्यक्रमसँगै पार्टीको आन्तरिक राजनीतिबारे पनि छलफल गर्ने तयारी छ । त्यस्तै भोलि मंगलबारदेखि १४ औं महाधिवेशनबाट निर्वाचित पदाधिकारी एवम सदस्यहरु सम्मिलित बैठक पनि आह्वान गरिएको केन्द्रीय सदस्य गुरु बरालले जानकारी दिए ।
निवर्तमान कार्यवाहक सभापति खड्काले तत्कालीन केन्द्रीय कार्यसमिति बैठक लगत्तै प्रदेश सभापति र जिल्ला सभापतिहरूको पनि भेला बोलाउने तयारी गरेका छन् ।
यता समानान्तर गतिविधि बढेसँगै कांग्रेस संस्थापनले अनुशासन समितिको बैठक बोलाएको छ । बुधबारका लागि अत्यन्त जरुरै भन्दै अनुशासन समितिको बैठक बोलाउनुले कांग्रेसमा कारवाहीको लहर चल्ने संकेत देखिएको छ ।
