दक्षिण कोरियाका कार्यवाहक राष्ट्रपति हान डक–सूले अमेरिकासँगको व्यापार वार्ता सजिलो नहुने बताएका छन् । तर उनले दुई देशबीच राम्रो सहयोगको सुरुवात हुने आशा व्यक्त गरेका छन् ।
दक्षिण कोरियाका अर्थमन्त्री र उद्योगमन्त्रीले अप्रिल २४ मा अमेरिकी कोषाध्यक्ष स्कट बेसान्ट र व्यापार प्रतिनिधि जेमिसन ग्रीरलाई भेट्ने हानले जनाए । दक्षिण कोरियाले अमेरिकासँग शान्तिपूर्ण र गम्भीरतापूर्वक वार्ता गर्ने प्रयास गर्ने उनको भनाइ छ ।
अर्थतन्त्रको बारेमा दक्षिण कोरियाली सरकारी अधिकारीहरूसँगको भेटमा हानले भने, ‘अमेरिकासँग वार्ताको प्रक्रिया सजिलो हुनेछैन । तर यसको बारेमा मानिसहरूमा अपेक्षा र चिन्ता दुवै छन् ।’
अप्रिलमा अमेरिकाले विश्वभरका धेरै देशहरूमा पारस्परिक भन्सार शुल्कको घोषणा गरेको थियो । त्यसबेलादेखि धेरै देशहरूले व्यापारको मुद्दामा अमेरिकासँग वार्ता गरिरहेका छन् ।
