काठमाडौं । सहिद स्मारक ए डिभिजन लिग फुटबलमा आज सातौँ चरणका खेल सुरु हुँदैछन् ।
दिउँसो १ बजे दशरथ रंगशालामा हुने पहिलो खेलमा विभागीय टोली एपीएफ र त्रिभुवन आर्मी भिड्दैछन् । छैटौँ चरणका खेल सकिँदासम्म एपीएफ ५ अंक जोडेर तालिकाको ११ औँ स्थानमा छ। अर्को विभागीय टोली त्रिभुवन आर्मी १० अंकसहित चौथो स्थानमा रहेको छ।
यस्तै दशरथ रंगशालामा दिउँसो पौने ५ बजे हुने दोस्रो खेलमा फ्रेन्डस् क्लब र न्युरोड टिम एनआरटी भिड्नेछन्। फ्रेण्डस् ६ खेलबाट ३ अंकसहित रेलिगेशन जोनमा छ भने एनआरटीले ७ अंकसहित आठौँ स्थान सुरक्षित गरेको छ।
जारी प्रतियोगितामा साविक विजेता मछिन्द्र १४ अंकसहित शीर्ष स्थानमा रहँदा आठ पटकको विजेता मनाङ मर्स्याङ्दी १३ अंकसहित दोस्रो र संकटा १२ अंकसहित तेस्रो स्थानमा छन्।
प्रकाशित मिति : २०७८ पुष १६ गते शुक्रवार
