काठमाडौं । गत साउनमा मात्रै ५७ हजार मेट्रिक टनभन्दा बढी एलपी ग्यास आयात भएको छ । नेपाल आयल निगमका अनुसार पछिल्लो पाँच महिनामध्ये साउनमा सबैभन्दा बढी ग्यास आयात भएको हो ।
निगमका अनुसार गत साउनमा ५७ हजार ३१६ मेट्रिक टन ग्यास आयात भएको छ । गत असारमा ४४ हजार ५४४, जेठमा ३२ हजार ८४२, वैशाखमा ३२ हजार ५६ र चैतमा ३८ हजार ७९९ मेट्रिक टन ग्यास आयात भएको थियो । निगमका निर्देशक विनीतमणि उपाध्यायका अनुसार साउनमा मात्रै देशभर ४० लाख ३६ हजार ३६४ थान सिलिन्डर बिक्रीवितरण भएको छ ।
असारको तुलनामा साउनमा करिब नौ लाख सिलिन्डर ग्यास बढी बिक्री भएको छ । एलपी ग्यासको आयात तथा बिक्रीवितरण आगामी दिनमा पनि निरन्तर हुँदै जाने उल्लेख गर्दै निर्देशक उपाध्यायले आवश्यकता अनुसार ग्यास खरिद गर्न उपभोक्तालाई आग्रह गरे ।
यसैबिच वीरगन्ज नाका भएर मात्र साउनमा ग्यास बोकेका एक हजार ६२२ बुलेट भित्रिएका छन् । २०८२ सालको साउनमा उक्त नाका भएर एक हजार २८७ ग्यास बुलेट भित्रिएका थिए भने २०८३ साउनमा ३३५ बुलेट बढी बुलेट भित्रिएका हुन् ।
नेपाल आयल निगमको वीरगन्ज कार्यालयका अनुसार १८ तथा २१ टन ग्यास बोकेर भित्रिएका ती बुलेटबाट दुई करोड ९९ लाख ८३ हजार ७५० किलोग्राम ग्यास भित्रिएको छ । नेपाल आयल निगमको वीरगन्ज कार्यालयका प्रमुख मोहनप्रसाद साहले मुलुकको झन्डै ६० प्रतिशत खाना पकाउने ग्यास भित्रिने वीरगन्ज नाकाबाट निर्बाध रूपमा ग्यास बोकेका बुलेट भित्रिइरहेको बताए ।
आधा सिलिन्डर ग्यास बाँडिन थालेपछि सर्वसाधारणले घरमा रहेका ग्यास सिलिन्डरको सङ्ख्या बढाएका र पूरा सिलिन्डर आएपछि भएका सबै सिलिन्डर भरेर राख्न खोजेपछि बजारमा अभाव सिर्जना भएको प्रमुख साहले दाबी गगरे ।
कार्यालयका प्रमुख साहले भारतको दुर्गापुर, हल्दिया, बरौनी र परादीपमा रहेका रिफाइनरीबाट ग्यास भरेर बुलेटहरू वीरगन्ज नाका भएर नेपाल भित्रिने गरेको बताए । आगलगी भएपछि असार २६ गतेदेखि दुर्गापुर र हल्दिया रिफाइनरीबाट ग्यास आउन छाडेको उनले बताए ।
