संयुक्त अरब इमिरेट्स (यूएई) मा जारी एसीसी पुरुष यू–१९ एसिया कप क्रिकेटको आफ्नो दोस्रो खेलमा सोमबार नेपालले बंगलादेशलाई एक सय ३१ रनको सामान्य लक्ष्य दिएको छ ।
दुबईस्थित द सेभेन्स स्टेडियममा टस हारी पहिले ब्याटिङको निम्तो पाएको नेपालले निर्धारित ५० मध्ये ३१.१ ओभरमै अलआउट हुनुअघि एक सय ३० रनमात्र बनाउन सक्यो ।
बंगलादेशविरुद्धको खेलमा पनि नेपाली ब्याट्सम्यानले निराशाजनक प्रदर्शन गरे । कुनै पनि ब्याट्सम्यान लामो समय क्रिजमा टिक्न सकेनन् ।
माथिल्लो क्रमका ब्याट्सम्यानको प्रदर्शन त झनै निराशाजनक रह्यो । आठौं नम्बरमा क्रिज समाल्न आएका अभिषेक तिवारीले सर्वाधिक ३० रन बनाए । उनले ४३ बलमा दुई छक्का हिर्काए ।
सातौं नम्बरका ब्याट्सम्यान आशिष लुहारले टोलीको खातामा २३ रन थपे । विकेटकिपर ब्याट्सम्यान आशिषले ४१ बलमा एक चौका हिर्काए ।
ओपनर ब्याट्सम्यान साहिल पटेल १८ र निरज कुमार यादव केवल १४ रनमा पेभेलियन फर्किए । वंश क्षेत्री चार र सिबरिन श्रेष्ठ पाँच रनमै आउट भए । युवराज खत्रीले ६ रन बनाए ।
निश्चल क्षेत्रीले खातासम्म खोल्न सकेनन् । कप्तान अकोश धामी पनि पाँच रनभन्दा अगाडि बढ्न सकेनन् ।
विपिन शर्माले पनि खाता खोल्न सकेनन् । दयानन्द मण्डल दुई रनमा अविजित रहे । नेपाली टोलीले अतिरिक्त रूपमा २३ रन पायो ।
बंगलादेशी टोलीका बलर मोहम्मद सोबुजले तीन विकेट लिए । साद इस्लाम, शाहरिया अल–आमिन र अजिजुल हकिमले दुईरदुई विकेट लिए ।
यसअघि, प्रतियोगिताको पहिलो खेलमा पनि श्रीलंकाविरुद्ध नेपाली टोलीका ब्याट्सम्यानले निकै कमजोर प्रदर्शन गरेका थिए । उक्त खेलमा नेपाली टोली केवल ८२ रनमा समेटिएको थियो ।
