काठमाडौं । कर्णाली प्रदेशको प्रदेश लोक सेवा आयोग वीरेन्द्रनगर सुर्खेतले एक जना परीक्षार्थीलाई दुई वर्षसम्म उम्मेदवार हुन नपाउने गरी कारबाही गरेको छ ।
दैलेख आठबीस नगरपालिका–९ का लोकराज सिंजापतीलाई परीक्षाको मर्यादा विपरीत कार्य गरेको भन्दै आयोगले लिने परीक्षामा दुई वर्षसम्म सहभागी हुनबाट बञ्चित गरेको हो ।
१७ वैशाखमा सञ्चालन भएको खुला/समावेशी प्रशासन सेवा सहायकस्तर पाँचौ तहको एकीकृत वस्तुगत लिखित परीक्षामा सिंजापतीले परीक्षाको मर्यादित विपरीत काम गरेको प्रदेश लोक सेवा आयोग वीरेन्द्रनगर सुर्खेतले जारी गरेको सूचनामा उल्लेख छ ।
आयोगका अनुसार आफूलाई प्राप्त प्रश्नपत्रको फोटो खिची सिंजापतिले मोबाइलमार्फत सोही दिन सामाजिक सञ्जालमा सार्वजनिक गरेका थिए ।
२२ वैशाखमा बसेको आयोगको बैठकले सिंजापतीलाई आगामी २ वर्षसम्म सञ्चालन हुने सबै तहको परीक्षामा उम्मेदवार हुन नपाउने गरी रोक लगाउने निर्णय गरेको प्रवक्ता बुद्धिबहादुर खत्रीले जानकारी दिए ।
