तुलसीपुर । दाङको तुलसीपुर–नेपालगञ्ज सडक अवरुद्ध भएको छ । गएराती देखीको अविरल बर्षाका कारण तुलसीपुर–१३ दमारगाउँमा सडक भासिदा तुलसीपुर–नेपालगञ्ज सडकखण्ड अवरुद्ध भएको इलाका प्रहरी कार्यालय तुलसीपुरका सूचना अधिकारी तथा प्रहरी निरीक्षक प्रकाश थापाले जानकारी दिनुभयो ।
उहाँका अनुसार अवरल बर्षासँगै आएको नालाको पानीले हेमपाइपबाट निस्कने ठाउँमा कटान गर्दा बटो अवरुद्ध भएको हो । एकतर्फ रुपमा साना गाडीहरु चलेपनी ठुला गाडीहरु भने आवतजावत बन्द गरिएको उहाँले बताउनुभयो । सडक मर्मत नहुदासम्म बैकल्पिक रुपमा घोराही सडक प्रयोग गर्न जिल्ला प्रशासन कार्यालय दाङले अनुरोध गरेको छ ।
यसैबिच यता घोराही र दुईखोलीको बिचमा पनि बर्षाका कारण सडक अवरुद्ध भएको छ । गएराती ८ बजेको समयमा लिादी भन्ने स्थानमा सडकमाथीबाट पहिरो खस्दा बटो बन्द भएको हो । यसले गर्दा यात्रुहरु सडकमा अलपत्र परेका छन् । अहिले पहिरो हटाउने काम भइरहेको प्रहरीले जनाएको छ ।
