दाङ । सवारी दुर्घटना न्यूनिकरण गर्न दाङका सडकमा फागुन १४ गतेदेखि टाइम कार्ड लागु गरिने भएको छ । आइतबार जिल्ला प्रशासन कार्यालय घोराहीमा प्रमुख जिल्ला अधिकारी रामबन्धु सुबेदीको अध्यक्षतमा यातायात व्यवसायी सम्वद्ध सरोकारवाला सहित बसेको बैठकले यस्तो निणर्य गरेको हो।
पछिल्लो समय दाङका सडकहरुमा यात्रा सुरक्षित र भरपर्दो नदेखिएपछि यसलाई थप व्यवस्थित गर्न टाइमकार्ड लागु गर्न लागिएको हो । दाङमा सवारी दुर्घटनाको जोखिम दिन प्रतिदिन बढिरहँदा सडक यातायात व्यवस्थित अभियान अन्तरगत घोराही–तुलसीपुर र घोराही–लमही–भालुवाङ सडकमा टाइम कार्ड लागु गरिदैछ ।
फागुन १४ गते तुलसीपुरको नयाँ बसपार्कबाट सुरु गरेर टाइम कार्ड लागु भएको घोषणा गरिने दाङका प्रमुख जिल्ला अधिकारी रामबन्धु सुबेदीले जानकारी दिनुभयो । सडकमा यातायात व्यवस्थापनलाई सुरक्षित, भरपर्दो र व्यवस्थित बनाउन टाइम कार्ड लागु गर्ने विषयमा यातायात सम्बद्ध सरोकारवालाहरु सहितको अर्को वृहत बैठक आगामी फागुन १३ मा पुनः बोलाइएको छ ।
सरोकारवालाको बैठक पश्चात फागुन १४ देखि टाइम कार्ड लागु गर्ने निणर्य भएको प्रमुख जिल्ला अधिकारी सुवेदीले बताउनुभयो । यातायात सम्बद्ध सरोकारवालसँग बसेको बैठकले टाइम कार्ड लागु गर्ने विषयमा निणर्य भैसकेको छ । तर पुनः एक पटक पूर्व तयारी स्वरुप बैठक बोलाएको उहाँले बताउनुभयो ।
टाइम कार्ड लागुको समय तुलसीपुरको नयाँ बसपार्कबाट तोकिने छ । टाइम कार्ड लागु भएपछि तुलसीपुरबाट घोराहीका लागि छुट्ने सार्वजनिक सवारी साधन बस, टिप्पर र ट्रकको नारायणपुरमा जाँच गर्ने व्यवस्था मिलाइएको छ भने अन्य विभिन्न स्थानमा छड्के अनुगमन समेत गरिने छ । टाइम कार्ड सुरू भएपछि तोकिएको समयमा मात्र सम्बन्धित स्थानमा पुग्नुपर्ने हुन्छ ।
सवारी जाँचका क्रममा नियमको उल्लङ्घन गरेको पाइएमा तुरुन्तै जरिवाना गरिनेछ । टाइम कार्ड यातायात व्यवसायी, ट्राफिक प्रहरी र सरोकारवालाको प्रत्यक्ष निगरानिमा सञ्चालन गरिनेछ ।
पहिलो चरणमा घोराही–तुलसीपुर र घोराही–लमही–भालुवाङ सडकामा लागु भएपछि यसको प्रभावकारीताको मूल्याङ्कन गरेर अन्य सडकहरुमा गुड्ने सवारी साधनमा पनी सञ्चालन गर्न सकिने तयारी गरिएको छ । ट्राफिक प्रहरीले अहिले तयार पारेको समय निर्धारणअनुसार तुलसीपुरदेखि घोराहीसम्मको समय अवधि ७० मिनेट तय गरिएको छ । यस्तै तुलसीपुरदेखि नारायणपुरसम्म ४० मिनेट समय तय गरिएको छ ।
