दाङ । दाङको देउखुरीमा डबल क्याप स्कारपियोले ठक्कर दिँदा दुईजनाको मृत्यु भएको छ ।
बुधबार बेलुका सवा चार बजेको समयमा लमही–भालुवाङ सडक खण्डको राप्ती गाउँपालिका–८ पिपरीमा पूर्वबाट पश्चिमतर्फ गइरहेको प्र ३–०१०२२ च १३६९ डब्बल क्याप स्कारपियोले सोही दिशातर्फ गइरहेको साइकललाई ठक्कर दिँदा साइकलमा सवार प्युठान जिल्ला झिमरूक गाउँपालिका–८, गोवडी घर भई हाल राप्ती गाउँपालिका–८ पिपरी बस्ने ३५ वर्षीय राधा बस्नेत र उनकी बहिनी २० वर्षीय बिपना केसीको मृत्यु भएको जिल्ला प्रहरी कार्यालय दाङले जानकारी दिएको छ ।
गम्भीर घाइते राधाको उपचारका क्रममा डाक्टरले मृत घोषणा गरेका थिए भने गम्भीर घाइते बहिनीलाई लमही अस्पतालमा सामान्य उपचार पछि बुटवल पठाईएको थियो । केसीको उपचारको क्रममा मृत्यु भएको जिल्ला प्रहरी कार्यालय दाङका डिएसपी जक मल्लले जानकारी दिनुभयो ।
गाडी तीव्र गतिमा रहेको कारण दुर्घटना भएको हुन सक्ने प्रहरी प्रारम्भिक अनुसन्धान गरेको छ । ठक्कर दिने गाडीका चालक फरार रहेका छन् । मृतक बस्नेतको शवलाई लमही अस्पतालको शव गृहमा राखिएको छ भने बहिनी केसीको शव लमही ल्याउन लागिएको प्रहरीले जनाएको छ।
