काठमाडौँ। नेपाली कांग्रेसको १५ औँ केन्द्रीय महाधिवेशन अन्तर्गत वडा अधिवेशन प्रक्रिया देशभर उत्साहजनक रूपमा अगाडि बढेको छ।
केन्द्रीय कार्यसमितिको निर्णयअनुसार असोज १६ देखि १९ गतेसम्म हुने महाधिवेशनको पूर्वतयारी स्वरूप जारी वडा अधिवेशनको दोस्रो दिन आज (असोज ४ गते) सम्म ७३ जिल्लाका ६ हजार १३२ वडामा निर्वाचन सम्पन्न भएको छ।
कांग्रेस केन्द्रीय निर्वाचन समितिका अनुसार ताप्लेजुङदेखि कैलालीसम्मका अधिकांश जिल्लामा वडा कार्यसमिति र क्षेत्रीय प्रतिनिधि चयन प्रक्रिया सम्पन्न भएको छ। असोज ३ गतेबाट सुरु भएको यो प्रक्रियामा सहभागी प्रतिनिधिहरूले निकै उत्साहका साथ आफ्नो मत जाहेर गरेका छन्।
निर्वाचन समितिले केही जिल्ला तथा निर्वाचन क्षेत्रहरूमा भने अधिवेशन बाँकी रहेको जनाएको छ। रसुवा, नुवाकोट र धादिङ जिल्लाका साथै सप्तरीका क्षेत्र नं २ र ४, सिरहा, मोरङ क्षेत्र नं ६, रौतहट क्षेत्र नं १, सर्लाही क्षेत्र नं २ र परासी क्षेत्र नं २ मा अधिवेशन हुन बाँकी छ।
समितिका सदस्य सचिव राजु कटुवालद्वारा जारी विज्ञप्ति अनुसार, आज सम्पन्न हुन बाँकी रहेका सम्पूर्ण वडा अधिवेशनहरू असोज ५ गते सोमवार पनि निरन्तर जारी रहनेछन्। तोकिएको कार्यतालिका अनुसार नै बाँकी रहेका वडामा प्रक्रिया पूरा गर्न सम्बन्धित जिल्लाका सरोकारवालाहरूलाई आग्रह गरिएको छ।
१५ औँ महाधिवेशनलाई भव्य र व्यवस्थित रूपमा सम्पन्न गर्न कांग्रेसले देशभर वडा तहदेखि नै चुनावी गतिविधि तीव्रताका साथ अघि बढाएको छ।
