दाङ । दाङमा प्रहरीले सासूको हत्या गरेको आरोपमा बुहारीलाई पक्राउ गरेको छ ।
बबई गाउँपालिका–७ राउताराकी ६५ वर्षीया सासु गंगी कुँवरको हत्या अभियोगमा बुहारी २३ वर्षीया जमुना कवँर पक्राउ परेको इलाका प्रहरी कार्यालय खिलतपुरले जनाएको छ ।
सासू गंगी कुँवरलाई हँसिया र चक्कु प्रहार गरेर हत्या गरेको आरोपमा बुहारी जमुनालाई पक्राउ गरिएको इलाका प्रहरी कार्यालय खिलतपुरका प्रहरी निरीक्षक नवीन चुँदालीले बताए । पक्राउ परेकी बुहारीले सासू गंगीको हत्या गरेको स्वीकार गरिसकेको उनले बताए ।
प्रहरी निरीक्षक चुँदालीका अनुसार केही समय यता सासू–बुहारीबीच मनमुटाव हुँदै आएको थियो । सोही क्रममा मंगलबार सासू गंगी खेतमा काम गरेर फर्कने बेला बिहान ९ बजे जमुनाले हत्या गरेको प्रारम्भिक अनुसन्धानको क्रममा खुलेको छ ।
गंगीको शव मंगलबार शान्तिनगर गाउँपालिका–६ स्थित कोरबाङको नर्सरीमा फेला परेको थियो ।
