हेटौंडा । नेपाल पत्रकार महासंघ मकवानपुर शाखाले सञ्चालनमा ल्याएको ज्येष्ठ पत्रकार पेन्सन कोषमा हेटौंडा उपमहानगरपालिकाले ५ लाख रुपैयाँ सहयोग गरेको छ ।
पत्रकार महासंघले २० वर्ष काम गरेका ६० वर्ष उमेर पुगेका ज्येष्ठ पत्रकारका लागि मासिक पेन्सन दिन कोष नै स्थापना गरेको छ ।
गत वर्षदेखि सञ्चालनमा ल्याएको कोषमा यसअघि पनि उपमहानगरले १० लाख रुपैयाँ सहयोग गरेको थियो । गत वर्षदेखि महासंघ मकवानपुर शाखाले ज्येष्ठ पत्रकारलाई मासिक ४ हजार रुपैयाँ प्रदान गर्दै आएको छ ।
हाल नेपाल पत्रकार महासंघ मकवानपुरका शाखाका पूर्व अध्यक्ष समेत रहेका नवराज शर्माले गत वर्षदेखि पेन्सन पाइरहेका छन् ।
महासंघ मकवानपुर शाखाले साधारण सभाबाट पेन्सन कोष सम्बन्धी कार्यविधि समेत पारित गरिसकेको छ ।
यसैगरी, उपमहानगरले मकवानपुर जिल्लाका १६४ जना पत्रकारको ५ लाख रुपैयाँका दरले दुर्घटना बीमा गरेको छ । बीमाबापत तिर्नुपर्ने प्रिमियम रकम १ लाख २२ हजार २७० रुपैयाँ महासंघ शाखा मकवानपुरलाई चेक हस्तान्तरण गरिएको मेयर हरिबहादुर महतले बताए ।
गत वर्षदेखि उपमहानगरले मकवानपुरका पत्रकारका लागि दुर्घटना बीमा गर्न शुरू गरेको छ ।
